Home Fréttir Í fréttum Sækja um framkvæmdaleyfi fyrir Vopnafjarðarlínu í vikunni

Sækja um framkvæmdaleyfi fyrir Vopnafjarðarlínu í vikunni

102
0
Heimil Mynd: Austurfrett.is

Landsnets stefnir á að sækja um framkvæmdaleyfi fyrir að leggja hluta Vopnafjarðarlínu 1 í jörð í vikunni. Stefnt er á að strengurinn verði tilbúinn í haust. Keyrt var á varaafli þar í á fjórða sólarhring í síðustu viku vegna bilunar á línunni.

Undirbúningur fyrir framkvæmdirnar hefur staðið í nokkurn tíma, enda sýna atburðirnir í síðustu viku að ekki er vanþörf á.

Steinunn Þorsteinsdóttir, upplýsingafulltrúi Landsnets, segir aðstæður á núverandi línuleið erfiðar, bæði sé þar snjóþungt og jafnvel snjóflóðahætta sem ógnað geti öryggi línumanna auk þess sem ísingarhætta sé þar sem valdi álagi á línuna.

Gert var áhættumat á línunni og var niðurstaða þess að leggja línuna í jörð á 9,6 km kafla, frá þeim stað sem línan sveigir til austurs frá veginum upp Hellisheiði Héraðsmegin að Vindfellshálsi í Vopnafirði.

Línan er á skipulagi tveggja sveitarfélaga, Múlaþings og Vopnafjarðarhrepps. Skipulagsvinnunni er lokið hjá Múlaþingi en breytt skipulag Vopnafjarðarhrepps liggur inni hjá Skipulagsstofnun til staðfestingar. Samningum er lokið við landeigendur.

Landsnet stefnir á að senda frá sér umsóknir um framkvæmdaleyfi í dag eða síðar í vikunni og stefnt að útboði í mars.

Framkvæmdir gætu þá hafist í vor og gangi allt að óskum verður nýi strengurinn spennusettur í haust.

Vorið 2022 verður framkvæmdum að fullu lokið með frágangi á leiðnni.

Áætlaður kostnaður við verkið er um hálfur milljarður króna.

Heimild: Austurfrett.is