Home Fréttir Í fréttum Bæjarráð vill flýta byggingu og stækka hjúkrunarheimilið á Selfossi

Bæjarráð vill flýta byggingu og stækka hjúkrunarheimilið á Selfossi

61
0

Bæjarráð Árborgar harmar það að ekki skuli hafa verið unnt að halda rekstri dvalar- og hjúkrunarheimilisins Kumbaravogs á Stokkseyri áfram þar til nýtt hjúkrunarheimili á Selfossi verður tilbúið.

Málið var rætt á fundi bæjarráðs í gær en bæjarráð lýsir yfir áhyggjum af stöðu mála hvað varðar hjúkrunarþjónustu fyrir aldraða á meðan nýtt heimili hefur ekki verið tekið í notkun. Ljóst er að mikið mun mæða á heimahjúkrun og félagslegri heimaþjónustu og að möguleikar á hvíldarinnlögnum munu takmarkast verulega.

Bæjarráð hvetur velferðarráðuneytið til að auka fjárframlag til heimahjúkrunar og minnir á óafgreitt erindi Sveitarfélagsins Árborgar þar sem ráðuneytinu var boðið upp á samning um dvöl notenda dagdvalar næturlangt á Vinaminni á Selfossi, en slíkt gæti létt undir heimahjúkrun og dregið að einhverju leyti úr þörf fyrir hvíldarinnlagnir.

Þá óskar bæjarráð eftir því að vinnu við undirbúning að byggingu nýs hjúkrunarheimilis á Selfossi verði flýtt svo sem kostur er en stefnt er að því að taka það í notkun á öðrum ársfjórðungi 2019. Bæjarráð ítrekar það sem fulltrúar sveitarfélagsins hafa lagt áherslu á að gera þurfi ráð fyrir að nýtt heimili verði stærra en 50 rými, heimilið þyrfti að vera 60 rými með möguleika á stækkun í 80 rými.

Hvað varðar flutning íbúa á Kumbaravogi í önnur rými hvetur bæjarráð Árborgar til þess að óskir íbúa verði virtar og að ákvarðanir verði teknar í samráði við þá og aðstandendur þeirra. Bæjarráði þykir miður að einum af stærri vinnustöðum sveitarfélagsins sé lokað og vonast til þess að starfsfólki gangi vel að finna önnur störf við hæfi. Þá fer bæjarráð þess á leit að ráðuneytið tryggi að Kumbaravogi ehf verði gert kleift að ganga frá starfslokum í samræmi við samninga.

Heimild: Sunnlenska.is

Previous articleVegamótastígur 9 víkur fyrir hóteli
Next articleFyrstu sperrur byrja að rísa á flugskýli Icelandair