Home Fréttir Í fréttum Nýr kafli Arnarnesvegar tekinn í notkun

Nýr kafli Arnarnesvegar tekinn í notkun

130
0
Mynd: VÍSIR/VILHELM

Arnarnesvegur milli Reykjanesbrautar og Fífuhvammsvegar verður tekinn í notkun í dag kl. 13:00.

Í tilkynningu frá Vegagerðinni segir að verktakinn muni þá fjarlægja lokanir og umferð verður í fyrsta sinn hleypt á veginn. Viðstaddir opnunina verða vegamálastjóri, bæjarstjóri Kópavogs og fulltrúar frá Kópavogsbæ og Garðabæ, verktakans og annarra sem komið hafa að verkinu.

„Verkið fólst í því að leggja nýjan 1,6 km langan veg frá mislægum vegamótum við Reykjanesbraut og austur fyrir Fífuhvammsveg. Að loknu útboði var samið við Suðurverk og Loftorku Reykjavík um verkið og hófust framkvæmdir í september 2015. Vegurinn mun létta á umferð um Fífuhvammsveg sem er þung á álagstímum.

Verklok voru áætluð 1. október 2016 en seinkaði af ýmsum ástæðum. Á vegkaflanum voru gerð þrenn gatnamót og tvenn undirgöng. Einnig var sett upp veglýsing, stígar gerðir, land mótað, hljóðvarnir settar upp og annað sem nauðsynlegt er til að ljúka verkinu.

Þrátt fyrir að nú sé umferð hleypt á veginn og hann tekinn í notkun er ýmsum frágangi ólokið en vinna við hann tefur ekki verkið. Frágangurinn verður að mestu lokið 10. desember. Hafin er smíði göngubrúar yfir Arnarnesveg með gerð undirstaða á móts við Þorrasali og kirkjugarð og verður þeirri framkvæmd lokið um mitt næsta ár.

Verkefnið er samstarfsverkefni Vegagerðarinnar, Kópavogs, Garðabæjar og veitufyrirtækja. Heildarkostnaður er áætlaður um 980 m.kr.

Í þingsályktunartillögu að samgönguáætlun 2015-2026 sem lögð hefur verið fyrir Alþingi en er óafgreidd, er gert ráð fyrir því að tengja Arnarnesveg við Breiðholtsbraut á síðasta tímabili áætlunarinnar 2023-2026 og létta þar með á umferðinni í efri byggðum Kópavogs,“ segir í tilkynningunni.

Heimild: Visir.is