Home Fréttir Í fréttum Skóflustunga tekin að mestu framkvæmdum Alþingis í 140 ár

Skóflustunga tekin að mestu framkvæmdum Alþingis í 140 ár

98
0
Nýju viðbyggingu Alþingis er ætlað að líta svona út. Mynd: Studio granda arkitektar

Fyrsta skóflustungan að nýbyggingu Alþingis var tekin í dag, sem markar mestu framkvæmd á vegum Alþingis í 140 ár. Byggingin verður 6000 fermetrar og mun koma til með að hýsa skrifstofur fyrir þingmenn, aðstöðu fyrir þingflokka, fundaherbergi nefnda og vinnuaðstöðu starfsmanna þeirra, auk funda og ráðstefnuaðstöðu. Byggingin verður tengd flestum byggingum Alþingis og verður þannig innangengt til Skála og þinghússins sjálfs auk húsalengjunnar við Kirkjustræti.

Steingrímur J. Sigfússon, forseti Alþingis, og Ragna Árnadóttir skrifstofustjóri tóku fyrstu skóflustunguna. Fram kom í máli Steingríms við þetta tilefni að kostnaðaráætlun fyrir bygginguna sjálfa hljóði upp á 4,4 milljarða króna að viðbættum verðbótum á byggingartíma. Byggingunni er þó ætlað að draga úr leigukostnaði til lengri tíma litið – „því leiga á fjölmörgum stöðum hér í Kvosinni á mishentugu húsnæði er óhentugt og dýrt úrræði,“ eins og Steingrímur komst að orði.

„Mest um vert er þó að hér verða skapaðar nútímalegar og fyrsta flokks vinnuaðstæður fyrir þingmenn og ekki síður starfsfólk Alþingis. Hér verða góðar aðstæður til að taka á móti gestum sem til Alþingis og þingnefnda koma og Alþingi verður mun betur í stakk búið til að halda ýmis konar fundi og minni ráðstefnur,“ sagði forseti Alþingis aukinheldur.

Framkvæmdin væri sú stærsta á vegum Alþingis í 140 ár, að sögn Steingríms, sem vísar þar til byggingu sjálfs Alþingishússins á árunum 1880–1881.

Eftir að nýbyggingin hefur risið geta þingmenn gengið innandyra á milli skrifstofa og allra fundarherbergja og þingsalar. Mynd: studio granda arkitekta

Tveir fyrstu verkþættirnir, jarðvegsvinna og steinklæðingin utan á byggingunni, eru þegar umsamdir. Útboð fyrir bygginguna sjálfa verður auglýst í vor og uppsteypa hefst í haust.

Sigmundur hafnar steinsteypuvæðingu

Sigmundur Davíð Gunnlaugsson, formaður Miðflokksins, birti pistil á vefsíðu sinni í dag af þessu tilefni. Þar rekur Sigmundur það sem hann telur steinsteypuvæðingu miðborgarinnar, á kostnað eldri borgarmyndar. Þar að auki telur hann nýju viðbygginguna vera kalda og hráa.

„Þrátt fyrir að Alþingishúsið hafi verið miðpunktur deilna um allt mögulegt í um 140 ár ber flestum saman um að andinn í húsinu sé góður. Það helgast ekki hvað síst hinni hlýlegu hönnun þess. Þannig eiga þinghús að vera, til þess fallin að lyfta andanum og auka vellíðan og bjartsýni,“ skrifar Sigmundur og bætir við:

„Með þessari framkvæmd er Alþingi að kasta á glæ einstöku tækifæri til að auka við það sem gerir gamla bæinn í höfuðborg Íslands sérstakan. […] Alþingi leggur nú sitt af mörkum við að tískuborgarvæða gamla miðbæinn og tekur þátt í þeirri eyðileggingu sem einkennt hefur skipulagsstefnu undanfarinna ára.“

Heimild: Visir.is