Söluverð fasteigna að nálgast byggingarkostnað á Austurlandi

Söluverð fasteigna að nálgast byggingarkostnað á Austurlandi

45
0
SHARE
Mynd: Austurfrett.is

Fasteignasali segir austfirskan fasteignamarkað, einkum á Fljótsdalshéraði, hafa verið óvenju líflegan það sem af er ári. Tvær vikur eru síðan flutt var inn í síðustu íbúðirnar í fjölbýlishúsinu að Miðvangi 6 í miðbæ Egilsstaða.

Húsið er í daglegu tali kennt við Hlymsdali, félagsaðstöðu aldraðra sem er á neðstu hæðinni, en íbúðir í húsinu eru ætlaðar eldra fólki.

Það á sér nokkuð langa sögu því byrjað var að byggja það fyrir hrunið 2008. Framkvæmdir stöðvuðust vegna gjaldþrots Malarvinnslunnar en félag á vegum VHE keypti síðar húsið og var það tilbúið snemma árs 2010.

Í húsinu eru 22 íbúðir. Fimm þeirra seldust nánast strax en síðan gekk hægt.

Skriður komst svo á söluna og á rúmu ári hafa selst 13 íbúðir. „Fyrst eftir hrun þótti verð íbúðanna mjög hátt.

Síðan hefur fasteignaverð á Egilsstöðum hækkað mikið en þessar íbúðir ekki.

Þær hafa verið á sama verði frá árinu 2010,“ segir Hilmar Gunnlaugsson, eigandi fasteignasölunnar Inni, sem selt hefur íbúðirnar, í nýjasta tölublaði Austurgluggans.

Keðjuverkandi áhrif

Sala íbúðanna hefur haft keðjuverkandi áhrif á fasteignamarkaðinn á Egilsstöðum. Eldra fólk kaupir íbúðirnar og selur einbýlishúsin sem það hefur búið í lengi til yngra fólks. „Áhrifin á fasteignamarkaðinn hafa verið afskaplega jákvæðið.

Það hjálpaði líka að VHE var tilbúið að taka eignir upp og sjá um að selja þær áfram.

Þegar fólk áttaði sig á að það væri hreyfing á íbúðum í húsinu stökk það til. Það eru ákveðin lífsgæði að búa í húsi sem þessu, með bílakjallara, félagsmiðstöð á fyrstu hæð og í hjarta bæjarins.

Þetta er sú tegund eigna sem samfélög þurfa,“ segir Hilmar.

Myndi muna miklu ef fasteignaverð stæði undir byggingarkostnaði

Hilmar telur hæpið að annað sambærilegt hús verði byggt á næstunni en vonast til þess að forsendur séu að skapast til að byggja meira á Egilsstöðum.

„Markaðurinn hér hefur verið líflegur allt þetta ár og stórar eignir hækkað nokkuð í verði, enda áttu þær mikið inni því verðin hafa verið lág miðað við byggingarkostnað. Ef byggja ætti sambærilega blokk frá grunni í dag myndi fasteignaverðið vart standa undir byggingarkostnaðinum.

Fasteignaverðið þarf að hækka aðeins meira þannig fólk sjái hag í að byggja en miðað við þróunina síðustu misseri þarf ekki mikið til að við séum komin á sjálfbæran stað. Það yrði gríðarleg búbót fyrir þetta samfélag.“

Fasteignamarkaðurinn hefur einnig verið líflegur víðar á Austurlandi. „Það er búið að vera gott alls staðar.

Á Seyðisfirði og Djúpavogi hefur vantað húsnæði. Á Vopnafirði og Norðfirði höfum við fundið mikla eftirspurn eftir góðum eignum og það sama gildir auðvitað um aðra þéttbýliskjarna í Fjarðabyggð.

Það koma góðir kaflar og svo rólegir inn á milli því það skortir húsnæði á markaðinn.“

Heimild: Austurfrett.is

NO COMMENTS

LEAVE A REPLY